കാലം ബാക്കി വെച്ചത്...

ARATHI

'ഇന്നലെ'കളിൽ തണുപ്പാർന്ന ഇടവഴി-

യോരത്ത് വിറയാർന്ന കൈകളാൽ

'നാളെ'കളെ വരവേൽക്കുമ്പോൾ; ഇരുട്ടാ-

ർന്ന, കഷണ്ടി പടർന്ന, നരച്ച തലയ്ക്കു-

മീതെ നീ കത്തിജ്ജ്വലിക്കുമ്പോൾ,

എന്റെ ചിന്തകൾക്കും ചൂടേറുന്നു.

നിലാവിൽ തേൻത്തുള്ളിയായി വന്ന്

മുത്തമിട്ടെന്നെ കൊതിപ്പിച്ച രാവുകൾ,

കണ്മഷി പരത്തിയ നീർച്ചാലിലൂടെ

എന്നെ കരയിച്ച പകലുകൾ,

അടുക്കും തോറും അകന്നു മാറി

ഒളിച്ചു കളിച്ച നാളുകൾ...

എങ്കിലും ഞാനറിയാതെ നീയെന്നെ

പിന്തുടരുന്നു; ഒരു നിഴലായ്;

ഞാനവസാനിക്കുമ്പോഴേ നീ നശിക്കൂ-

യെന്ന ചിന്ത നിന്നെയും വേട്ടയാടുന്നുവോ

സഖീ? എങ്കിലും സാരമില്ല,

ഒരു കാലത്തിന്റെ ചിന്തകളിൽ നീ

തന്നെ  ആയിരുന്നല്ലോ...;

ഇന്ന് ഞാൻ ഭയക്കുന്നില്ല

മരണത്തെയും; അതിനാൽ

ഓടിവരിക, എന്നിലേക്കലിയുക...

സഹജമാമീ മനുഷ്യജീവിതത്തിൽ

'കാലമേ' ഒരുപിടി ഓർമ്മകൾ

മാത്രം ബാക്കി വെയ്ക്കുക...